Publication Alerte sur Facebook cofib capital

@ Ahmeed

La crise des subprimes n’est pas une pyramide de Ponzi, mais c’est des crédits hypothécaires à des taux hauts en prévoyant que les biens hypothéqués vont gagner en valeur mais avec la crise de l’immobilier (alimenter elle-même par les subrimes) et la mutualisation des risque, cela à dégénéré en crise mondiale.

J’aime lire ALERT et bravo pour ce qu’ils font mais parfois ils mélangent des patates et des tomates sur la même balance.

الله يرحمه

C'est un peu difficile de trafiquer les bases de données pour que le client trouve sont argent en consultant l'application de COFIB!!

Si c'est le cas, c'est qu'il y a plusieurs personnes de leurs SI qui sont impliqués....

صحة شريبتكم،

⚠️ اليوم بش نحكيولكم على كارثة وقعت في السوق المالية وقعت هالأيام القليلة الفارطة…

🔴 نحبّو نحكيولكم على خطّة بونزي الهرميّة (pyramide de ponzi) الّي يستعملوها بعض المتحيّلين للاستيلاء على أموال ضحاياهم عادة تحت غطاء عمليّات استثمار وهميّة.

❗️من اشهر العمليّات الّي تمّ كشفها في العالم هي الخطّة الهرميّة الّي قادها برنار مادوف في الولايات المتّحدة و الّي مشا ضحيّتها العديد من المستثمرين الكبار و منهم عدّة مشاهير. عمليّة التّحيّل هاذي دامت لمدّة عشرات السّنين، من بداية التّسعينات إلى أواخر سنة 2008 وقت الّي الأسواق الماليّة انهارت في خضمّ أزمة الدّيون العقّاريّة sub-prime.

❓يقول القايل علاش، و احنا في تونس، بلد الحوكمة الماليّة المتميّزة والرّقابة الفطنة (ماغير ضحك)، باش نحكيولكم على أشياء كيفما هكّة؟ الجواب هو الّي الجمعة الّي فاتت، تمّ اكتشاف عمليّة تحيّل هرميّة في احد وسطاء البورصة التّونسيّة، Cofib Capital، الّي تمّ مؤخّرا شراؤه من طرف مجمع الاتّحاد البنكي للتّجارة و الصّناعة، شهر UBCI.

⭕️ قبل ما نحكيو على شنوّة صار في Cofib Capital، خلّينا نفهمو عامّة كيفاش تتكوّن عمليّات التّحيّل الهرميّة هذه.

في اغلب الأحيان، العمليّة يكون على رأسها مستشار مالي. السّيّد هذا عندو حرفاء يستثيقوه على مدّخراتهم باش يستثمرها في مشاريع والّا في أسهم شركات و يحقّق من خلال هذه الاستثمارات نسب ربحيّة إذا المشاريع والّا الشّركات هاذي تكون رابحة و قيمتها تكبر.

◀️ على سبيل المثال، تمشي انت لمستشار مالي تختاره وتقلّوا الّي عندك عشرة الاف دينار تحبّ تستثمرها. ياخو هو من عندك العشرة آلاف هذيكة (عمليّا يحلّك حساب عندو كيما الحساب البنكي) و يشري بيها اسهم متاع الSFBT مثلا، الّي هي مدرجة في بورصة تونس. كلّما اسهم الSFBT قيمتها تطلع في البورصة، كلّ ما هاكا العشرة الاف دينار متاعك قيمتها تزيد. وبالطّبيعة، نظريًا (توّ نشوفو مبعد علاش مهمّ انّو نقولو نظريًا) الحريف يكون عندو امكانيّة الاطّلاع على حسابه في ايّ وقت و يشوف فلوسه وين تحطّت و قدّاش ربح والّا خسر.

❓و يقول القايل المستشار المالي شنوّة ربحو؟ عادة ياخو نسبة قارّة على كمّيّة الأموال الّي يتصرّف فيها من شيرة و نسبة من المرابيح الّي حقّقها من خلال الاستثمارات الّي عملها. مثلا في مثالنا احنا، ياخو واحد و الّا ثنين بالمائة سنويّا على العشرة آلاف دينار و إذا العشرة آلاف دينار هذيكة قيمتها زادت بالف دينار جرّاء استثماراته النّاجحة، يزيد ياخو نسبة من الألف دينار هاذيكة.

❗️في حالة انّو مستشارنا المالي يكون متحيّل و يقرّر انّو يكوّن عمليّة هرميّة، عادة ما يوعد النّاس بنسب ربحيّة مغرية و عادة تكون غير منطقيّة (مثلا 15 وًالّا 20 بالمائة سنويّا) و بعد ما يقبض الفلوس، في عوض يستثمرها في أسهم و الّا في مشاريع، يمشي يصرفها لحسابه الخاصّ.

⭕️ باهي، هوني كانكم تبّعتونا تنجّمو تتسائلو: ماهو قلنا انّو الحرفاء عندهم امكانيّة الاطّلاع (نظريّا) على حساباتهم و مراقبة العمليّات الماليّة الّي يقوم بيها المتصرّف، كيفاش ما يفيقوش انّو فلوسهم تصرفت؟ هوني تبدا عمليّة تدليس كشوفات الحسابات متاع الحرفاء. و هذه عمليّة معقّدة لازمها شركاء في عمليّة التّحيّل و تكوين منظومة حسابات (comptabilité) موازية و لا تمتّ للحقيقة بصلة. مثلا، برنار مادوف الّي ذكرناه أعلاه، كان يخدّم في قرابة عشرة من النّاس الّي وضيفتهم الوحيدة هي اختلاق كشوفات الحسابات والتّثبّت انّها متناسقة ما بين بعضها و ما تثيرش الشّبهات. فالآخر، الحريف بنجّم يطلب كشف حساب و يشوف انّو حسابه فيه فلوس و انّو فلوسو قاعدة تجيب في مرابيح، في حين انّه في الواقع، المتصرّف المالي، الّي هو متحيّل، صرفهم مثلا في سهريّة.

❓السّؤال الثّاني الّي تنجّمو تسألوه هو التّالي: ‏كيف الحرفاء يحبّو يجبدو فلوسهم، كيفاش يعمل صاحبنا بما انّو هو صرفهم؟ هوني نجيو بالضّبط علاش العمليّة هاذي يسمّيوها هرميّة: باش المتصرّف المالي ينجّم يستجيب لطلبات الحرفاء الّي يحبّو يسترجعو فلوسهم، يلزم يدخّل فلوس من عند حرفاء جدد و بالتّالي قاعدة الحرفاء متاعو لازمها بالضرورة تمشي و تكبر… في شكل هرمي. الحرفاء الجدد يطمعو كيف يشوفو نسب الرّبح العالية الّي يوعدهم بيها المتصرّف المالي و يطمانو كيف يشوفو الّي معارفهم من الحرفاء القدم الّي طلبو فلوسهم خذاوها. و مادام صاحبنا المتصرّف ينجّم يجيب حرفاء جدد يغطّيو طلبات حرفاؤه القدم الّي ڤدمهم في فلوسهم (شاشيّة هذا على راس هذا)، الخطّة الهرميّة متاعو تقعد قائمة. أمّا إذا كان طلبات استرجاع الأموال كبرت، و عجز صاحبنا المتصرّف انّو يستجيبلها، هذاكة يكون نهار الكشفة، والبناء الهرمي الكلّه ينهار. هذا ما صار لبرنار مادوف في الأزمة الماليّة متاع 2008، بعد عشرين سنة من الّي بدأ العمليّة متاعو، وقتلّي حرفاؤه طلبو فلوسهم و ما نجّمش يستقطب ما يكفي من الأموال الجدد باش يغطّي الطّلبات هذه.

🔴 بعد ما طوّلنا عليكم بالحديث، نرجعو توّا لتونس و لل Cofib Capital.

⚠️ الحكاية بدات الجمعة الّي فاتت بحادث مرور مأساوي توفّاو فيه كلّ ركّاب السّيارات المتصادمة. الله يرحمهم الكلّ و يصبّر اهاليهم. واحد من الضّحايا كان متصرّف مالي يخدم في وسيط في البورصة التّونسيّة: Cofib Capital Finances. الوسيط هاذا تمّ شراؤه من طرف UBCI Bourse في أواخر سنة 2023.

⭕️ بعد ما صار الحادث و بعد وفاة المتصرّف المالي، وهوني نسوق المعلومات هذه بكلّ تحفّض لانّو المعطيات مازالت شحيحة، ثمّا ثلّة من اصدقاؤه المقرّبين الّي في بالهم بالعمليّة و الّي عندهم فلوس مع المرحوم، توجّهو للوسيط في البورصة و حاولو استرجاع أموالهم قبل ما يشاع الخبر. الّا انّهم تفاجؤوا انّه حتى حساباتهم هوما ما فيهاش أموال و كُشفت اذا العمليّة الهرميّة الّي كان متستّر عليها المتصرّف المالي. الخسائر الّي تمّ التّعرّف عليها إلى حدّ الاَن و الّي هي تقديرات اوّليّة من مصادر غير رسميّة و مرّة اخرى، نسوقوها بتحفّظ، وصلت إلى ما يقارب ال15 مليون دينار (مليار من الملّيمات) ل123 حريف الّي تمّ التحيّل عليهم. بعض الحرفاء كانو يتصوّرو الّي حساباتهم فيها 2 مليون دينار وفق الكشوفات الّي عندهم، ليكتشفو انّه في الحقيقة الحسابات تقريبا فارغة.

🔴 السّيّد الّي قام بالعمليّة هاذي توفّى (الله يرحموا) و احنا في آلارت قرّرنا انّنا ما نسمّيوهش. غالب الضّن و منطقيّا، الأموال الّي تمّ الاستيلاء عليها لن يتمّ استرجاعها (الا اذا تم التدخل من صاحب الشركة لتفادي التتبعات العدلية). آما الّي يهمّنا في آلارت هو انّو نفهمو كيفاش وصلنا للحالة هذه و كيفاش عمليّة بهذا الحجم لا يتمّ التّفطّن اليها:

⚠️ كيما فسّرنا أعلاه، العمليّة هاذي لازمها شركاء خاصّة لتزييف كشوفات الحرفاء. شكونهم الشّركاء و الّي ايّ مدى استفادو من العمليّة هاذي؟

❓كيفاش عمليّة من هذا النّوع و مبالغ بهذا الحجم يتمّ الاستلاء عليها و منظومة الرّقابة الدّاخليّة (Controle interne) متاع Cofib Capital ما تفيقش بيها؟ هوني نذكّرو انّه وسطاء البورصة يخضعو إلى رقابة هيئة السّوق الماليّة و البنك المركزي الّي من المفروض يسهرو على انّو الشركات المؤتمنة على فلوس النّاس يكون عندها منظومات رقابة تحميها من عمليّات التحيّل من هذا النّوع.

❓كيفاش مراقب الحسابات متاع Cofib Capital ما فاقش بالعمليّة هاذي والحال انّه وضيفته التّثبّت من صحّة حسابات الشّركة و الإشعار في حالة التّفطّن لاخلالات من هذا النّوع؟

⭕️ هاذي كلّها أسئلة نطرحوها و تأملو انّو التّحقيقات تجاوب عليها لتفادي انّه عمليّات من هذا النّوع تتعاود.